الأربعاء، 4 فبراير، 2009

ابكى يا قلبى

ابكى يا قلبى بصوت عالى
حس البكا جواك مالى
الدنيا والهوا وخيالى
يا تموت يا قلبى يا تهدالى
مش عاوزة ليك صورة قبالى
ما كفاية كل اللى جرالى
حرام عليك بص لحالى
الدنيا عمالة تضلم
والجرح عمال بيسلم متخلنيش أنا استسلم وتحطملى كده كل آمالى نور لى نور فى طريق بكرة نورلى يمكن ألاقى فكرة مش عاوزة أشوف جواك ذكرى لجراح خلاص مش على بالى ابكى يا قلبى بصوت عالى ...

الأحد، 26 أكتوبر، 2008

خلاصة أيام الأكتئاب

جالسة أنا تحت مظلتى، ارتجف خوفا من عمر ينقضى ، أتوخى حذرى من الوقوع فى الحب ، قلق و ألم و عذاب ينصب ، فجأة ارتعدت يدى من شدة الرياح ، فطارت المظلة ... لتهطل أمطار دموعى معلنة ، أننى لم اعد قادرة على مواجهة الحياة وحدى ..

الجمعة، 19 سبتمبر، 2008

أدعوا معى للحكومة ..

أعرف ان هذا البوست لن يلقى إعجاب كثيرين من قرائه ولكنى اكتبه عن اقتناع تام ووجهة نظر أحب توضيحها .. فبعد أن دخلت العديد والعديد من المدونات السياسية منها والعامة .. وجدت أن معظمها إن لم تكن كلها فى حالة هجوم عنيف ودعاء مستغاث لا ينقطع على الحكومة ..وان تبتلى الحكومة بكارثة إلهية تحملها.. أما أنا فضد ذلك تماما .. فعلى الرغم من أننى ضد الحكومة وضد سياستها فى حل المشكلات او حتى طرق التفكير فى المشكلة نفسها ولكنى لا ولن ولم أدعو على الحكومة .. سيدنا ونبينا و أسوتنا صلى الله عليه وسلم رغم كل ما عاناه من قومه وإيذائهم الشديد له وهو نبى الله ورسوله .. ولكنه لم يدع على قومه أبداُ و إن كانت دعوة واحدة منه قادرة على رفع كل ذلك عنه ولكنه كان يقول .. " اللهم أهد قومى فإنهم لا يعلمون " إننى أدعو لها .. وأدعوكم أيضا للدعاء لها .. نعم أدعوا لحكوماتنا بالهداية وخاصة فى هذه الأيام الفاضلة من شهرنا الكريم .. فماذا سنستفيد نحن إذا دعونا على الحكومة ؟؟ بل ماذا إذا استجيبت الدعوة ؟ ماذا أدرانا إذا دعونا عليها أن تضل أكثر ما هى ضالة ؟ ندعو بأن يموتوا جميعا ؟؟ ماذا أدرانا بالحكومة التالية ؟ ركزوا معايا كده .. (بينى وبينكم احم اللهم أغزيك يا شيطان ) .. مش مش مش يمكن الخديو اسماعيل يسلمها للخديو توفيق ويقوم توفيق بدوره بتسليمها للانجليز خالصة مخلصة .. ولا أيه ؟؟ سامحنى يارب أنا مش قصدى أنم انا بوضح لهم بس .. طيب ولما ندعيلها ؟؟ مش يمكن ربنا يهديهم .. تخيلوا لو ربنا هدى واحد فيهم .. مش هينضف وزارة بحالها ؟؟ طيب ولو هدى اسماعيل ؟؟ تخيلوا ساعتها ايه اللى هيحصل ؟؟ أنا هسيب الموضوع لخيالكم وياريت تدعو معايا للحكومة . اللهم أصلح شاننا وشأن حكومتنا .. اللهم وفق حكومتنا لما فيه الخير والسلام .. اللهم اهدهم الى تنفيذ الوعود والكلام .. اللهم أبقهم مادام بقائهم خيرا لنا .. وإن لم يكن فأصرفهم عنا لئن لم تهدهم علينا فارحمنا يا أرحم الراحمين .. يارب أحييهم مادامت حياتهم فيها خيرا لنا ولهم .. و أمتهم ما دام موتهم فيه خيرا لنا ولهم ..اللهم ذكٌرهم بنبأ فرعون وملأه إنهم كانوا قوما ضالين .. اللهم اجعل لهم أيه فى قصة فرعون وموسى .. اللهم لا تجعل فيهم فرعوناُ علينا .. يارب أصلح شأنهم إنهم لا يعلمون ، وذكٌرهم بعذابك لعلهم يتذكرون.. اللهم كن لنا ولا تكن علينا .. اللهم لا تؤاخذنا بما فعل السفهاء مننا .. اللهم وفق حكومتنا لما تحبه وترضاه .. اللهم أمين امين .. وصلى اللهم وسلم على سيدنا وشفيعنا محمد بن عبد الله وأله و أصحابه وسلم تسليما كثيرا ..

الجمعة، 22 أغسطس، 2008

واجب الاعتذار للأفندية

5 تاج أحمدك يارب أولا يا جماعة : بعتذر لأخواتى كراكيب، ودعاء و منار ؛ بنت الاسلام و تامر الحسينى ( انسان عاشق حر ) و ابن مصر( son of egypt ) وده لأنى قصرت جدا فى عملوا واجباتهم ولكن بجد كانت ومازالت ظروف خارجة عن ارادتى والله .. ثانيا :بعتذر لأصحابى اللى هو انتوا كلكوا على تأخيرى عن المدونة والرد على التعليقات ومتابعة مدوناتكم وده لنفس السبب والله كنت مشغولة شوية كمان الجهاز كان بيعاندنى 3 شويات . ثالثا : وده الأهم بشكرجداا جدا كراكيب حبيبة قلبى ديما وحشانى وبتسأل عليا علطول و zozo وابن مصر طبعا المناضل اللى قدر بشجاعته ينزل السويس ..هههههههههههههههه وصوت من مصر وعمرو النوبى وهانى علوان ومحمدحمزة وكل الناس اللى سألت عليا مش عاوزة أكون نسيت حد .. بجد بجد ألف شكر و ألف تحية وحشتونى جداااااااااااااااااااااااا أما عن واجب الطالبة الكسلانة فأهديه اليكم يا أنوار حياتى .. التاج الأول اذكرى 16 صفة فى شخصيتك ؟ كان نفسلى اسأل بس اشمعنى 16 ليه مش 15 أو 20 يعنى .. المهم .. 1- أحب أمى و أبى و أخواتى حبا مرهقا لدرجة أننى أبكيهم اذا ما ذهبت فى رحلة أو أى مكان أفرح بدونهم ..تعودت أن أتقاسم الفرحة معهم بل أننى كثيرا ما أفرح فقط لمجرد فرحتهم . 2-قنوعة لدرجة تخيف ابى وامى على مستقبلى أرضى بأقل القليل..والحمد لله . 3- شديدة الصبر والتحمل لكنى عصبية فى بعض الأحيان . 4- أعشق النظافة والنظام بشكل متعب يستغرق منى أوقاتا و أوقات. 5- قليلة التركيز ..أتشتت بسرعة وبضرب لخمة فى أبسط المواقف بس مش ديما .. 6-أتحدث بعفوية شديدة وقد اكتشف اننى بخبط فى الكلام وبزعل الناس عن دون قصد والله وساعات مبكتشفش كمان . 7-حالمة ورومانسية جدا لكن لا يعرف ذلك الا المقربون منى جدا لأننى أتعامل مع الحياة بواقعية شديدة . 8- أعشق الموسيقى والغناء الهادف موسيقى عمر خيرت وقوة صوت أصالة وعزوبة صوت شيرين وعمق صوت منير وعروبة صوت فيروز .. ؟أصوات تنقى النفس من المشاعر الغبية الهبلة .. وكأنك تحلم حين تغمض عينيك وتسمعهم . 9- أتمنى أن يأتى يوما أغنى فيه للحب من قلبى ( مش بابا وماما بقا ) .. معلنة ذلك للعالم اجمع . 10- جريئة فى أفكارى دائما مترددة فى تعاملاتى أحيانا .. أعشق المغامرات وخوض التجارب الجديدة . 11- أحب السفر والرحلات والتنقل فى كل مكان جديد حتى وان لم أكن بحاجة لزيارته فقط حب استطلاع كل ماهو جديد . 12-أكره الفضول كما أكره ثرثرة الفتيات والخوض فى سير الأخرين . 13- أمقت البكاء على الأطلال بشدة .. انسى كل ما يؤلمنى سريعا لأبدأ فى عمل جديد ويوم جديد احيا كل يوم حياة جديدة . 14-لا أوقف حياتى عند صديقة ندلة او موقف أحمق .. لأننى أعرف جيدا ومؤمنة بشدة ان الحياة بها الحلو والمر و عشان استمتع بحلاوة الحلو لازم الاول اتأذى من طعم المر . 15- أكره المشاكل جدا و ابتعد عن أى مثار للجدل أو المشاكل فى أى مكان مما قد يتسبب فى ضياع حقى أحيانا . 16- كتومة جدا لأسرارى وأسرارا غيرى فقليل ما احكى ما بداخلى أو بمعنى اصح قليل ما اجد من أحكيله و أثق به نفس الوقت .. كما اننى لا اتحايل أو أحاول حتى معرفة أسرار الأخرين . الحمد لله التاج الثانىىىى اذكرى أحلاما تخص ماضيك كنت هتتخلى عن أيه وهتتمسكى بأيه لحد دلوقتى ؟ 1-حلمت وما زلت أحلم انى أقدر أطبق السنة النبوية بشكل صحيح وكامل ومستمر فى حياتى . 2 كان نفسى أكون مطربة و انا صغيرة وكنت بغنى فى المدرسة وكده لحد الاعدادى وبعدين اتحجبت وفهمت انه مش هينفع فقلت خلاص يبقا مذيعة ولأنى لا بفهم تاريخ ولا جغرافيا ولا بعرف احفظ أصلا كان صعب انى ادخل اعلام ذاكرت فى الثانوية العامة عشان ادخل هندسة جاتلى علوم عين شمس اعترض اهل البيت على السفر قلت دى علوم يا جماعة ومنها الى تربية السويس .. ادعولى بقا اخد البكالوريوس السنة دى ان شاء الله . 3- حلمت ان الحرب تقوم وتحصل ثورة تانى عشان مصر ترجع وانى اموت شهيدة لما كنا بناخد درس جميلة بوحريد . 4- كل لما يجى رمضان بروحانياته .. احلم انى ابقا داعية اسلامية معرفش ازاى ؟؟ 5- حلمت ان مصر تخرج من دول العالم الثالت قبل لما اموت .. افتكرت انى ممكن اشوف مصر لما توصل للمرحلة دى .. ياااااااااااااااااااااااااااااااة ..لسه بدرى طولة العمر لأحفادنا بقا .. حلمت بحاجات كتير ولسه بحلم وهفضل احلم طول عمرى عشان أقدر أعيش .. اذكرى أحلاما تخص مستقبلك وما تتمنيه منه ؟ يعنى ...امممممممممممممممممم رئيسة مجلس أدارة وخلاص .. مش عارفة والله حلمى مش متوقف عند حاجة نفسى أكون نافعة ومفيدة وخلاص أساعد أى حد فى أى مكان بأى شكل و أعيش وأعييش أهلى حياة سعيدة و أوفر لهم راحة البال والجسم والقلب .. على رأى فؤاد بحلم ويحلالى بحلم وانا مالى باللى هيحصل ايه ؟.. راضية انا بحالى راضية وبعيش حالى منغير ما افكر فيه .. واللى قدرت عليه اللى قدرت عليه يكفى ويحلالى بحلم وحلمى بسيط لا كتر مال ولا صيت بحلم ظاكون نفسى يسمع غنيا الطير بغنى غنوة خير للدنيا ولنفسى بحلم وحلمى عنيد لكن نصيبى أكيد لازم هيوصلنى ما دمت انا وياة وفى قلبى نبض حياة قادر يوصللنى بحلم ويحلالى أذكرى شخصيتين على الأقل متواجدين فى حياتك كنت تتمنى وجوهم من قبل ؟؟ المدونة وكل اللى عرفتنى عليهم بجد بجد كان نفسى يكونوا معايا من زمان والحمد لله ناس عاقلة عاوزة تعمل اى حاجة مش عايشة وخلاص . بجد أنا فخورة انى أعرفهم . اذكرى شخصين غير متواجدين فى حياتك تتمنى وجودهم فى حياتك وحياة أولادك ؟؟ أتمنى وجود ولو شخص واحد فى حياتى وحياة أولادى يارب ان شاء الله يعرف معنى ( الله- الحب _ التسامح - التضحية _ الحياة _ الجنة ) وكل سنة وانتوا طيبييييييييييييييييييييين بحبكوااااااااااااااااااااااااااااااااااااااااااااااااااااااااا والسلام عليكم والحمد لله واشهد ان لا اله الا الله وأن محمدا رسول الله

السبت، 9 أغسطس، 2008

عقبال مليون سنة يا نور عيونى

زى النهاردة شفت القمر ده و أدانى وردة عمرى ما هنسى فى ودنى همسة وعلى ايدى لمسة دنا لسه حاسة بالحب ده خليكى جنبى يا حب قلبى ايه بس ذنبى ما تزيدى تعبى بالشكل ده خليك فاكرها ؟؟ أنا ليا غيرها ؟؟ عشقى أسيرها فى العين هيشيلها وهفضل كده العمر كله روحى وضله ليكى يا بنتى يا كل عيلتى يا أختى و أميرتى عسولة يختى فى عيد ميلادك الله أكبر ينور حياتك وطريقك أخضر وأشوفك عروسة ......وهفضل أفكر عريسك مقاسك.... ..ولا انتى أقصر !!
أوصف مشاعرى !! ... عمرى ما هقدر
حتى أعبر عن حبى ليكى
يا ملبن وسكر
يا بنت ماما ..... وبنتى واكتر
كل سنة وانتى احلى بنوتة واطيب أخت فى الدنيا
بحبك اووووووووووى يا أول واخر صديقة ليا فى حياتى

الاثنين، 28 يوليو، 2008

والبقية تأتى

قانون وللمرور جميل والله خير ، وفوق الغرامة حبس واهانة ! مهوحضرتك عندك حصانة ، واونكل سرور عربيته بشوفير ، وغيره مش لاقى يعيش ع الحصير ، حقيقى ده ... يا سيادة الوزير ؟؟ حسيتوا بينا وبالهم الكبير ، ولا خلاص نسيتوا الفقير ، ومفاضلش غير مرتضى وشوبير ، حتى الرياضة صابتها البلادة ، حالها يغم ويجيب النكادة ، وازاى احس فوز او ادوق طعم السعادة ، على نادى حاله مال وضاع ودى الاكادة ، ومرتضى مخليها والعة وبيجيب سيرة حماده ، مش حقد لكن فين حق المواطن ؟ العدل لازم ما دام انت حاكم ، ازاى تبقا انتا فى القصر ساكن ، والناس دى عاملة القبور مساكن ، هو انتا كده حليت المشكلة ؟؟ دى الرشوة بتعمل بلاوى متلتلة ، والغنى ابو اللبانة والسلسلة ، هيطلع برئ ويسوى المسألة ، يا سيادة الوزييييييييييييييييييييييييير ، بلدنا فيها خيار وفاقوس ، ناس عيشتها ضنك وناس داعكة الفانوس ، والله ما هيتحبس مادام معاه فلوس ، الأزمة سببها ضعاف النفوس ، نفسه يبطل يبيع عرقسوس ، وياكله فرخة اولحمة جاموس ، بدل الحميرى والمش ابو سوس ، واذا مكانش فيه مفر.... وع الحق الشريف أصر وصاحبنا منه مل ...... ومفيش قدامه حل هيديها للمحامى هيكونله منها حامى يبدل الأسامى ......... وينول الرضا السامى هيعمل أى حاجة هيكلم ابن ماجة وعشان أعصابه تهدى ... هيحطها فى تلاجة واللى مات يموت .... نحطه فى التابوت وأهله نشتريهم ...... ونضمن السكوت هيحصل ده أكيد ..... وبقول بأعلى صوت عشان توزنها لازم.... متزلش الشريف ساوى الرؤوس هيرضى ... بلا غش ولا تزييف اضمنلله عيشة صالحة ..... او حتى رغيف نضيف هيعمل ساعتها واجبه ..... لا رشوة ولا تحريف كرامته مجروحة منك .... وجالها خلاص نزيف يرضى عنا وعنك ....... اعقل بلاش تخريف ..

الجمعة، 4 يوليو، 2008

.. الراحلة ..


من صغرى أذاكر وكتير اعافر وكتب يا ساتر

كلام طلاسم منغير معالم

وياما قلت وعليكو هنت

جنازتى ماشية والجاى حاسم

منا عارفة انى هاخد شهادتى .. وهقعد هنا جنب امى وأختى.. حتى الشهادة يا عم قاسم

الله يسامحك .. فتحت عينى .. علمتنى ازاى اعانى

أطلب بحقى أتعلم وأفكر .. وأدينى شاربة المر لكيعانى.

جنازتى ماشية .. سامحنى يابا .. كان نفسى انجح أو اموت فى طابا

قدرى وجالى ... الله يسامحه صاحب المعالى.

يا امى ما تبكى .. وادعيلى ديما ..بالرحمة يمكن السما مفتوحالى .
الأرض ضاقت .. مش عارفة أعيش .. ده كل وشبع وده بيشرب حشيش
دكتور وياخد رشوة وبقشيش.
وصاحبنا عنده قصر وغناوى وحاططلى صورته على الأفيش
ويقولوا قال فى ازمة عيش..
شبابنا ضايع وكله صايع .. وأخره يحب ع الكورنيش..
كلام بقوله وانا عارفة انى هطلع وهنزل على .. مفيش..
نهايتكوا جاية .. تعالوا ورايا
ولقيت هنا .. شباب صبايا
أجسامها تحت.. وروحها معايا
ماتوا زمان مع حلمهم... لما الأسد باع همهم
باع كليته يا حسرته.. صاحبه وقتله يا كسفته
سجنوا ابويا .. مات الولد .. ليه يا أسد ..
ورايحلى شرم وشايلى هم .. اللى بره هو اللى جوه تمام
وحاططلى عينك على جايزة سلام ..
دى المية قاطعة من الحمام.. اهى تصريحات وكله كلام
مشيل نفسك ذنوب واثام
ده عمر رصف الطريق لخوفه.. خاف لربه يساله .. من كسوفه..
عن نعجة تعثر ماتفهم يا خوفو ..
هتفهمنى لما اليهود يطوفوا...

الخميس، 26 يونيو، 2008

ستبقى وحدك ..



كم أحببتك !! والتمست معك الحنان . فما اعظم الحب الحقيقى النابع من القلوب العامرة بالأيمان والنفوس النقية الهادئة التى تتوق الى بلوغ اسمى مراتب الجمال والكمال .

كم أحببت فيك طموحك أملك وحرصك على مصلحتك !! فاقتربت منك لعلنا نكون من عباد الله الذين يجتمعوا عليه ويتفرقوا عليه ..

أردت ان نتبادل هذا الحب بعيدا عن الحقد و الحسد بعيدا عن كل الضغائن لكى لا تشوب حبنا شائبة .. لتظل قلوبنا مغموسة بالحب الأصيل مدعمة بأواصر المحبة الصادقة من البداية والى الجنة .. ولكن ..

تفاجأت بك تريدينى انا وكل من حولك .. ( حاشية ) .. مجرد وسائل لنشعرك بالأمتنان ولنوصلك لأعلى مراتب الأمان واسمى مراتب السعادة والمتعة حين تشعرين انك الأفضل و الأقوى والأجمل . وان ذهب أحد عنك او غفل للحظة تهزأى جنابه وتذللى اللى جابه ليبعد دون ان يسأل .

فأنت تريديننى .. ان تمشى .. فمن خلفك ، وان تجلسى ... فمن بعدك ، وان تحزنى ... بجوارك ، وان تفرحى .. كأوتارك ، وان تركضى ... كحمارك .

ولكن .. انت نسيت انك وان ظننت انك قوية وذات شخصية فاننى أبيية .. وأأبى ان اكون هكذا لك أو ان يكون غيرك لى هكذا . فأنا كالأخر والأخر لا يقل عنى شيئا .

فلتقتربى من الله وتتواضعى فمن تواضع لله رفعه ، ولتعرفى ان احدا لن يقبل منك ان تظلى لتقولى ( انا ) طوال الوقت .. ولن يطيق السماع لك فانت تحبى ان يسمعك الخرون دائما .. ولست قادرة على سماعهم .

فأنت تحبى ان يسمعك الأخرون ، لما على ان اسمعك و أرد واجيب و اواسى وافرح ؟؟

وان نصحتك او اختلفت معك أبيت الا ان تسمعى صوت نفسك ، وصرخت طالبة ان يصمت الجميع .. أذن فليكن فها انت الأن وقد صمت الجميع .. بل رحل ز. فلقد اصبح الصمت أبدى .

رحل الجميع من حولك ولن ياتوا و انت من فعل ذلك بغرورك وانعدام ثقتك بنفسك ..

فما تكبر من أحدا إلامن ذلة يجدها فى نفسه سعديت جاهده أن أجعلك لله وللناس ولكنك أبتعدت أبيت إلا أن تكونى لنفسك وها هو غرورك يرسم إليك احلاما ويبنى لك قصورا فى الهواء ويزف إليك نبأ وصولك للقمة .. فانت الملكة التى لا يرفض لهت طلب فانت احلى و اغلى فتاة فى الوجود صاحبة القلب الرقيق الودود .. والأن سوف ابتعد واتركك هنا .. وحدك .. وسيتركك الباقون كما تركك السابقون ، ولتؤكدى لنفسك اكثر ان العالم رهن إشارتك .. إن أشرت اقترب وإن ابيت اغترب ..

.. حبيبتى.. لتشعلى شمعة وتبدأى بإنارة قلبك المظلم ، أو لتمطر دموع ندمك ليصفو هذا القلب الملبد بالغيوم .. ولتثقى انك كالأخرين وأن أحدا لن يسمح لغيره بالنظر إليه من اعلى لأننا ببساطة لم يبق من احدا بالأعلى . فالجميع أصبح فى قاع الزجاجة بعد ان فشلت كل محاولات التشبث بالعنق ..

هذا وإلا ..... ستظلى هنا وحدك لتقولى ( ا نا ) .. ولن تجدى ردا سوى صدى صوتك يجيبك قائلا .. ( لا شئ ) ..






السبت، 14 يونيو، 2008

دى سياسة دولة .. سياسة الحكومة ..





6% حصلوا على 90 % فى اختبار العينة العشوائية من امتحان التفاضل فى الثانوية العامة !!!!!!


88% حصلوا على 50 % فقططططط !!!!


ههههههههههههههه ما شاء الله .. ونعم نجحت مصر


نجحت مصر الولادة فى ان تجبر أولادها .. على نسيان فكرة الكليات العلمية ، وليتوجه الجميع للدراسات الأدبية ؛ لنقرأ الكتب الأدبية ولنبحث فى المعجم و ندرس التااااااااااااااااااااااااريخ ونحلل الماضى ؛ لنعرف أصل أجدادناااااااااااااااااا الفراعنة.. اممممممممممممممممممممممممممممم طبعااااااااااااااااااااااااااااااااااا


لازم ننظر للماضى أومال هنرضى بالحاضر المرير ده أزاى ؟؟ ولو ان الماضى كان على الاقل فيه الناس بتلاقى تاكل..


لكى نتأكد اننا تطورنا .. لكن ندرس العلوم (نووووووووووووووووو) عيب كده عيون الشباب هتتفتح على حاجات اكبر من سنهم أيوة مينفعش نعينهم فى أى مجلس قيادى قبل سن ال 60..


ميصحش نفكر .. ميصحش لا نطور ولا نتطور .


مش جديد .. مش جديد عليكى يا مصر .. أيوة وبقول يا مصر عشان راضية ومتقولوش وهى مالها


طالما ساكتة تبقا راضية..ولو مش راضية ليه المادة 117 من القانون المصرى مازالت بتطبق؟


المادة دى تنص على فصل أى عضو هيئة تدريس تجاوز فترة مهمته العلمية بالخارج .


المادة دى فصلت الدكاترة أحمد زويل وفاروق الباز و مجدى يعقوب وأخيرا د / عصام حجى اللى يمكن كمان فى ناس كتير متعرفهوش أساسا .


د/ عصام حجى شاب مصرى عمره 32 عاما ومن أهم علماء وكالة ناسا.


لو كان قعد فى مصر كان زمانه لسه قاعد فى بيتهم مستنى الوظيفة ومش لاقى ياكل..


لكنه قام واشتغل ودور وتعب ولقى .( ان الله لا يضيع أجر من أحسن عملا )


ودلوقتى مش قادر يرجع بلده ينفعها ولو بالقليل .. أصل مصر مستكفية ومستغنية


فعلا هى فيها اللى مكفيها وناس مفتحة زيى دول هيعملوا قلق ومش هيرضوا ومش هيسكتوا ( بمعنى أصح هيغنولها أغنية عمرو دياب هتمرد ع الوضع الحالى )


مش بقولكم مش جديد..طب ارجع بيكوا شوية كمان .. الدكتور يحيى المشد .. ها كام واحد سمع عنه ؟؟ الراجل ده عمل أعظم أبحاث عن المفاعلات النووية وحاول يفيد بيها مصر لكن فشل .. بسبب العدوان الثلاثى على مصر .. استدعته العراق وراح وحاول ينفعها بيها كدراسة ..ولكن تم اغتياله.. أثناء أقامته فى فرنسا على يد الموساد..ولا حد هناااااااا. مش بس كده ده بقاله 28 سنة مستشهد وأهله مش لاقيين له معاش !!


بحثوا فى الجامعة التى كان يرأس أحد أقسامها .. وجدوا ان تاريخ الجامعة لا يذكر أسمه أصلااااااااااااا !!


عظيييييييييييييييييييييييم !!


احصائيات الأمم المتحدة بتقول ان مصر نسبة الأمية فيها وصلت الى 50%..... وفى المقابل نجد الحكومة تنقص 3 % من الميزانية المخصصة للتعليم فى الموازنة القادمة..ههههههههههههههه .


يعنى تقريبا لقيت مفيش فايدة قالت توفر أحسن ..


هتروحى لفين يا مصر !! هتقوموا معايا ولا لأ ؟؟ قوموا خليكوا رجالة .كل واحد يعمل اللى عليه ، يراعى ربنا فى أهله وبيته ونفسه قبل اى حد واى حاجة ، أدى نفسك حقها . ذاكر وأنجح ، استغل الصيف فى التقرب لربنا .. مش لازم سهر للتليفزيون بس ، خلى سهرة كل اسبوع حتى لربنا .. ولنفسك .. اعمل ودور. , هتوصل وتلاقى ، الشغل مش هو اللى هيدور عليك ، البلد محتاجة رجالة يرفعوها ويدوروا ورا اللى مخربينها ، محتاجة ظباط أحرار ، رجالة ثورة، بدال محنا عمالين نتسرق كده بالراحة انا متكلمتش غير عن التعليم ومش هتكلم عن الباقى لأنكوا عارفين وشايفين..


وده عشان التعليم هو البنية التحتية.. فجسد الدولة به مضغة اذا صلحت صلح الجسد كله واذا فسدت فسد الجسد كله ، الا وهى التعليييييم..لكنه للأسف أصبح تعتيم.


البلد دى فيها رجالة يا رجالة ؟؟


أنا هحجز أول تعليق...وبقولكم لا تعليق!



الأربعاء، 7 مايو، 2008

تائهة ..


حين دق البرد جسدى وشعرت ببرودة الجو .. وسقطت دمعاتى على وجنتيى ..

امسكت كوب الشاى باللبن بيدي الأثنتين وضممته الى لعلى أدفء ... أو ....أو لعلى أردت أن أشعر أن هناك شيئا مازلت أستطيع التمسك به ..


وكلما ارتشفت رشفة من كوبى ازداد تساقط دموعى .

أتمنى ألا يفارقنى .. فانا بدونه وحدى .. وكلما ابتعد اشتق اليه ..

اخرج الى شرفتى ومازال بين يديى ، انظر الى تلك الدنيا وهذا الكون العجيب الذى ما عدت أتأمل فيه الا وأشعر بالوحدة والغربة ، أنظر الى هذا الزحام الذى تاهت فيه القلوب وتحطمت به المشاعر وأنغمس به الجميع فى دنيا الألة فأصبح كككل مناااا عبدا للتكنولوجيا.
أنتابتنى حالة من الخوف والحزن خفت أن أته فى هذا العالم الظالم الذى لا يرحم وتطحننى تلك الألة التى تسير فى طريقها لا ترى ضعيفا ولا ترحم مغلوب ؛فهى فى طريقها نحو التطور والمال ..
ولا تسمع الا صوت حفيف أوراق البنكنوت وضجيج الألات وانفجار القنبلات وغناء الراقصات ،وانهيار المبانى وسباق الثوانى وماراثون الأغانى، وأخطاء الأطباء وفراق الأحباء ،،،،،،
ولكنى أرى تلك الزهور المتمايلة وتلك الزهرة التى تضم الأخرى بحنان وهذا الرجل الذى أخذ بيد الصغير ليعبرالى بر الأمان ..يااااااااة ... ما كل هذا الدخان .
أرى صديقتى التى أنا هنا بانتظارها ..لقد وعدتها ان أظل بالشرفة ولن أرحل .. سأظل

لم أسودت الدنيا هكذا .. وصديقتى !! ماذا سيحدث ؟؟
هل ستأتى أم أنها لن ترانى هى الأخرى ؟؟
لم يبق الا أن أنظر الى السماء والى ما تبقى من مخلوقات الله لعلى أجد الأنسان لم يعبث بها ولم يغيرها ،، فأجد بها دفء وحنان ،
أجد بها رأفة وحب ، وأتحسس فيها باقى الأمل ..
فزادتنى غيومها التى صنعها الأنسان قلقا وخوفا..
فهل ستظل هى الأخرى هكذا !!
أم هناك بصيص من الأمل قد تطل به أشعة الشمس على شرفتى المظلمة !!
أم سأخرج معهم وأنزل .. لأشترى الحب وسط الزحام .. وهل سأجده حب أم قد يكون زيفا هو الأخر ؟؟

الثلاثاء، 22 أبريل، 2008

انا بزاكر وهرجعلكم قريييييييب ادعولى

الاثنين، 17 مارس، 2008

لا للتعليم ...!!!


من منطلق دراستى .. او البيئة المحيطة حوليا اصحابى وزملائى ..أقدر أقولكم ان التعليم فى زوال .. و أنصكوا كمان لما تتجوزوا وتخلفوا أوعوا تودوا عيالكوا المدارس . زاكرولهم انتوا احسن .. مش مصدقين تعالوا كليتى وشوفوا .. اشرحلكم المشوار التخين اللى بيبدأ بالأنهيار تخيلوا لما تكون بداية المشوار انهيار اومال نهايته هتبقى ايه !

يييييييييييييييييييييييييييي بالحتم جهل علمى وغباء تربوى ومعنوى وفشل أدبى وشلل جسدى ..

لما نكون ثانوية عامية وما أدراكوا كلكوا مجربين طبعا . أحم .الشبح اللى العيال اللى لسه فى ابتدائى خايفين منه وبيفكروا فيه .. بعد الدروس والشحططة والدح والسهر والذى منه ( ثانوية عامة علمى ياضة بقا ) .. لما فى الأخر تدخل تربية زيك زى بتاع علمى علوم اللى جايب 59 % اة والله 59 % دخلوا تربية بيولوجى تخيلوا !!

يعنى انتا داخل الكلية كاره أمها وكمان معاك واحد ناجح ب 36 درجة متخيلين يعنى منغير ال 36 درجة دول كان زمانهم بيعيدوا

سيبكوا من ده .. لما يكون طالب بيتهته وواحد تانى صوته او صوتها عموما يعنى صوتهم واطى جدا واللى خطة لا يتشاف ولا يتقرا ...

أنا مش بتريق بس سورى يعنى أزاى دول يبقوا مدرسين ؟؟ولما دول يبقوا مدرسين عام الطلبة يبقا شكلهم ايه ؟؟

بلاش كل ده .. طب لما واحد يبقا بقاله 7 أو 8 سنين فى الكلية يوم ما يتعين يبقا مدرس أزاى ولا مؤاخذة ؟؟

طب والبنات اللى لابسة ضيق وع الكمر وبادى وسترتش وبرمودة و ... و... وخلافه . وتدخل تربية عملى فى مدرسة بنات او ولاد أزى دى تبقى قدوة للبنات ؟ ولو فى مدرسة ولاد هيعملوا فيها ايه ؟

طب واللى بيترفعوا بدرجات الرأفة فى مواد زى طرق التدريس أو علم النفس هيدرس ازاى لما هو مش بيعرف فى طرق التدريس ؟

ماشى واللى بيشرب سجاير واللى بيلفوا واللى بتشيش على القهاوى هيدرسوا لمين ؟

واللى بينجح وبيجيب تقديرات بس (بالغش ) لما يبقى مدرس يقف مرلقب ( بأنهى وش ) ؟

واللى ..... واللى ...... واللى ..... هقول أية ولا ايه ؟؟

انا مش بعيب على الزملاء هما حرين فى حياتهم الشخصية وفى منهم كتير أكيد فى مجتمعنا بس المشكلة أنه مينفعش يكون فى كلية التربية

زمان كان المدرسين بيتعملهم اختبار عشان يدخلوا حاجة اسمها معلمين او معلمات مش كلية تربية واللى مش بينجح مش بيدخل ايه اللى جرى هو احنا احسن من الجيل اللى قبلنا ؟؟

مش حرام والنبى نخلف عيال يشوفوا السواد ده كله بيقول اهى شهادة وخلاص بس انا فى رأيى (تعليم لا هدف من وراءه سوى الشهادة حتما لا ترجى منه اى استفادة )

وعايزين المجتمع يتحسن طب ازاى ؟ اذا كان مؤسسى البنية التحتية أصلا مش عندهم بنية تحتية اساسا . مش التلميذ ده اساس المجتمع لما تبقى الأمثال دى قدوته . تخيلوا معى مجتمع المستقبل ..

الثلاثاء، 11 مارس، 2008

لكم اشتقت ايك ..!


أشعر بنبضة قلبى فى جميع أنحاء جسدى.
تسرى فى عروقى قطرة دماء مشتعلة .
وما هذه الهزة التى رجت المكان والدنيا من حولى .
توقفت عقارب الساعة ليقف الزمان عند تلك اللحظة .
ذهب الركب وارنحل الجميع وانا هنا وحدى .لا لست وحدى يتملكنى ويؤانسنى الخوف والقلق.
انتظروا لا تتركونى معهم وحدى ..
لا تتركنى وحدى لأذهب بدونك للا وجود. أنا بدونك وحيدة تائهة معدمة من أواصر الأمن والأستقرار..
فأنت أمنى وأمانى وصلتى الوحيدة بالحياة .أنت كل مظاهر الحياة لا أنت حياتى بل أنت الحياة نفسها .
لا تتركنى معهم وحدى ..
أنا هنا وانت هناك ... لا أعرف أين ... أنت بعيد ولكنك معى .. أراك وهاهى صورتك لاحت فى الأفق واشتم رائحتك تفوح من حولى ..
لا تتركنى معهم وحدى ..
أنت مصدر الحب الأول الذى عرفته انت حبى وحياتى .. يا حبيبى .كم أشعر الان بقيمتك ! ما أعظمك ! وما أطيبك!!!
اشتقت اليك يا وجودى ..اشتقت الى ان اجدنى ..
لقد ملكت كيانى فلا تدمره .احفظنى واامنى والا لن ابقى فى تلك الحياة .لن ابقى فى تلك الحياة بدونك .
فالحياة بدونك لا معنى لها .فانت مظاهر حياتى..
انتظرك يا أبى هنا وحدى لتأتى وتضمنى بين ذراعيك وحضنك الدافئ ..
فليأخذ الله من مرضك ويعطينى .. ويا ليته يعطينى صحة على صحتى لأهبها لك يا وجودى .
اشتقت اليك والى تلك الروح التى تبعثها فى بيتنا ..اشتاق اليك المنزل التى عمت أركانه الكأبة فى غيابك وذهبت عنه الضحكة والفرحة ليحل محلهم الخوف والقلق .. فلا تتركنى معهم وحدىيا أبى يا أحن من حاكيت .. اشتقت اليك يا أبى
ابنتك المشتاقة

السبت، 23 فبراير، 2008

شوفوا أختى كاتبة ايه !!

كله تاه كله ضاع كله حاسس بالضياع كله بيقول بكرة تتحسن الاوضاع والمشكلة كله ساكت كله شايف بس خايف كله مطنش كله مكبر وكل يوم احنا بنتأخر ساءوا للرسول واحنا ساكتين غلوا الاسعار واحنا قاعدين وازاى هنبئا مسموعين فاضل ايه تانى ؟ديون وغرقتنا ،اساءة وبهدلتنا ،أسعار وموتتنا الناس وبهدلوها ،أخلاق وبوظوها، بكليبات وغيروها ،مخدرات بيروجوها ياعالم ارحمونااااااااااااااااااااااااااا (امنية على فكرة فى تانية اعدادى) تخيلوا لماتبقا قدنا هتحس باية وهتقول اية ؟؟ (لا تعليق)

17 ثم ماذا بعد؟؟

حين عجز اللسان عن الكلام .. وعجز القلم عن الكتابة.. وعجز العقل عن التفكير..لم .. لم لم تعجز عينى عن البكاء؟؟ لابد أن ابكى يا حبيبى .. فلم اعد احتمل كل هذه الاهانات ..وانا هنا وحدى وانت بعيد فى عالم أخر تاركنى انا وكل من يحبونك لنلاقى كل هذا..فليتنى كنت معك.. فها انا هنا ,,واقفة مع الواقفين لا يسعنى سوى الكلام والتحقير والاسى والاسف و.....و.....و.... على هؤلاء الذين لايعرفونك ولكن يعرفونى ويعرفون طبعى فأنا المصرية لا أفعل سوى (الجعجعة) بجعجع ع الفاضى .. (بق) أنا لا أعجب من فعلتهم بل انا معهم فيما يفعلونه..فهم لا يعرفونك ..فمن يعرفك لا يسعه الا الصلاة والسلام عليك يا حبيبى يا رسول الله.. فهؤلاء المسلمون الذين لا يمتون للاسلام بصلة من اساء لنا وشوه صورتنا هم مجرد اسماء وديانات .. فعذرا .. ولكن ماذا علينا نحن؟ ماذا سنفعل ؟؟؟ هل سنقف هنا عاجزين مكتوفى الأيدى ؟؟ ننظر الى هؤلاء نظرة السخرية والتحقير؟ من هنا ..من اماكننا ؟؟ فى المرة السابقة قاطعناهم ..ثم ما لبثنا ان سامحنا وغفرنا وبسفاهتهم لم يعرفوا ان هذا هو ديننا ، تجلى وطغى علينا من دون ان نشعر لنجد أنفسنا نقول (المسامح كريم) فظنوا انه ضعف و استكانة وان المسلمين ثورجية وبلطجية( فجأة يقوموا مرة واحدة يزعقوا وبعدين يروحوا فى نوم عمييييييق) على الرغم من اننا فى الفترة القصيرة التى قاطعنا فيها اغلقنا عدد لا بئس به من الشركات لديهم_وكانت صحيفة واحدة هى من اساءت لرسولنا الكريم _ ماذا الان بعد ان اساءت 17 صحيفة ؟؟ لا أملك سوى ان ادعو و أصلى وأدعوكم وأوصيكم وأستحلفكم بالله أن تقاطعوا كل ما له صلة بهم .. (من تشبه بقوم فهو منهم ) ولن اتشبه بمن يسء لحبيبى ولو فى طعامهم ... فهيا لنفعل شيئا لنصرة هذا الديييييييييييييييييين ... الله أكبر فوق كيد المعتدى والله للرسول خير مؤيد أنا عن طعامهم وشرابهم سانقطع والى كلام ربى والرسول ساستمع يا هذه الدنيا أطلى واشهدى والله بحياتى عن الحبيب لافتدى ولكن الله على كلامهم ليشهد فقاطعوا معى ومن اليوم فلنبتدى

الخميس، 21 فبراير، 2008

هكذا أحب


أنا فتاة ككل الفتيات اتعامل بذوق ورقة ،اتمتع بكل المشاعر الراقية ،أتوق الى الحب الدافئ وتدغدغ مشاعرى الكلمات اللطيفة أحاسيسى تستهويها الرومانسية يقولون عنى انى كالسهل الممتنع فلست معادلة كيميائية معقدة او طلسما من طلاسم الرياضيات احتاج الى شرح وتبسيط أيضا لست سلسلة مفاتيح يمسكها من يشاء ويتركها متى شاء ..

فانا كلقطة ان احببتنى احببتك وان تغدر فساكشر عن انيابى ..فاحترس.

فعلى الرغم من اننى احب الكلمات اللطيفة والرومانسية ولكنى لن اتنازل عن حريتى او رفاهيتي لادخل قصرديكتاتوريتك لتكون انت الامر الناهى وانا الجارية المطيعة .

فالحب وحده لا يكفينى لاكون لك كذلك .فعليك ان تجعلنى ادخل قفص حبك برضائى

احتوينى لادخل هذا القفص واغلق الباب بملئ ارادتى وابقى لك مدى الحياة (أحبك) هذا الحب الصادق الذى تدعمه تقوى الله.

لن أرضى بالبقاء معك ان لم تمنحنى عناصر الدلال والرفاهية بعد الأطمئنان والثقة .فالبقاء معك بدونهم ما هو الا سجن بانتظار الموت .

ولن امل فى انتظار من يمنحنى هذه العناصر وان طال انتظارى .فالحب بدون شروطى لن أقبله لمجرد الحب ولكى اسمع ما أحب أن أسمعه ..لا يا حبيبى فبدون هذه العناصر انت مجرد طاووس شكله جميل وليس له فائدة كذلك تكون مجرد رجل قادر على الامر والنهى والصرف ولكنك لست قادرا على امتلاكى أنا بكل مشاعرى لتملأ على كيانى لتجدنى اسيرة لعشقك كذلك تكون رجلى الحقيقى ولست رجلا مزعوما .. امتلكنى .. امتص غضبى .. عزز ضعفى .. ارض كبريائى ..ارسم مستقبلى .. وظف قدراتى .. عظم طموحى .. و (احفظ كرامتى ).

اريد ان اكون جزءا منك .. اسرى بدمك تعرف حزنى من عينى .. تقرانى ..تغمض عينيك وترسمنى .. تشخص نبرات صوتى وتنوعها.. نبرة الحزن والفرح والغضب والحب والحنين وتتعامل مع كل حالة .
(فليس الشديد بالسرعة ولكن الشديد من يملك نفسه عند الغضب .)
هكذا الرجولة فى نظرى هى القدرة على الاحتواء والامتلاك والتغيير و الاحتمال .
كن رقيقا ،ودودا،مبتسما ،هادئا ، أعرف متى تشد ومتى ترخ !! كن انت العقل وانا القلب ، فكر معى قوومنى وقوم سلوكياتى ،سامحنى ،واغفر لى وتأكد من اننى أحبك وليس لى سواك ورضاك هو هدفى ؛ فانت حبيبى ومنى نفسى ، فساعدنى وادعو لى واستغفر لى وتحملنى ؛ فانت غضبت تحملتك وان غضبت تحملتنى لندخل الجنة معا ..
أساعدك على النجاح ،اهيئ لك الجو النفسى لتنجز اعمالك ،أريدك ناجحا متميزا ؛لأفخر بك انا وأبناؤنا ،أريدك عظيما أبا لعظماء مملوء بالطموح والامل .لست ياءس قليل الحيلة تظل ماكثا لتبكى على ما قد فات وفى انتظار ما هو اات.
(فالحب ينبغى ان يملا حياتنا انه الروح الدافع لكل انسان للعمل والخلق والابتكار ،فاذا انعدمت هذه الروح فقدت الحياة اهميتها ..)
هكذا تمتلكنى واسمح لك بتغيير اسمى لأصبح ملكا لك ..
حينها لن أرضى بغيرك بديلا فهذا الحب والعشق لا شفاء منه وحين ترضى عنى ستملأ نفسى بالامل والرضا والسعادة والهناء ..
ولكنى أخشى ان يصيبنى الطمع فحينها لن اقبل سوى ان اكون معك برفقتك .. فما احلى الغرق فى بحور الحب !
لأكون شديدة الاخلاص والطاعة فندخل الجنة سويا .. فلن تعد عتمة الليل تفزعنى وانت معى وانا بداخلك ولن تعد وحشة الوحدة تخيفنى فنحن معا مدى الحياة ز. وأنا ملكك الى الأبد ..(تمت)

الأربعاء، 20 فبراير، 2008